Skipulag þarf að vera á forsendum alhliða heilsueflingar, bæði líkamlegrar og andlegrar, auk þess að hámarka loftgæði. Skipulag þarf að stuðla að sjálfbærri þróun, tryggja félagslega blöndun, þannig að sem flest hverfi endurspegli þverskurð samfélags.
Vinna skal áfram að þéttingu byggðar án þess að raska yfirbragði eldri hverfa og tryggja jafnframt verndun menningar– og náttúruminja.
Tryggja þarf heilnæmt loft og vatnsgæði, verndun líffræðilegs fjölbreytileika, ábyrga umgengni og aðgengi almennings að náttúrunni og grænum svæðum til útivistar í göngufjarlægð frá heimilum.
Jafnframt þarf að tryggja aðgengi að verslun og þjónustu í göngufæri. Vinstri græn styðja gerð borgarlínu sem mikilvægan þátt í að minnka umferð. Eflum almenningssamgöngur innanbæjar, ekki síst sem nýtast börnum, eldri borgurum og námsfólki.
Stórauka þarf uppbyggingu stígakerfis og tryggja snjómokstur og hreinsun stíga. Hjólreiðar þurfa að vera öruggur valkostur til samgangna allt árið um kring. Uppbygging nýrra hverfa þarf að styðja við umhverfisvænan lífstíl, svo sem með rafhleðslum fyrir rafbíla og aðstöðu til ítarlegrar sorpflokkunar. Styðja þarf íbúa í eldri hverfum til hins sama. Við leggjum áherslu á að öll samgöngutæki í eigu Kópavogs séu knúin umhverfisvænum orkugjöfum. Jafnframt þau tæki sem þjónusta Kópavog, svo sem skólabílar.
Bæta þarf aðgengi fatlaðra í bænum og tryggja aðgengi allra að útivistarsvæðum.